Shqipëria dhe Maqedonia kanë nisur rrugën e tyre të integrimit në Bashkimin Evropian. Për të qënë pjesë e këtij organizimi të rëndësishëm, është i nevojshëm përcaktimi i standarteve evropiane në fushën sociale, ekonomike, duke përfshirë edhe energjinë dhe mjedisin. Në përputhje me Direktivat Europiane  dhe paketën e udhëzimeve për energjinë dhe mbrojten e mjedisit, të dyja vendet janë zotuar për arritjen e objektivave ambiciozë “20:20:20”, ose ndryshe rritja e efiçiencës së energjisë me 20%; rritja me 20 % e përdorimit të energjive të rinovueshme dhe ulja me 20 % e emisioneve të dioksidit të karbonit deri në vitin 2020.

Ndërsa të dyja vendet janë duke shënuar një progres të kënaqshëm për adaptimin e legjislacionit evropian në legjislacionin vendas, vihet re një stanjacion në zbatimin praktik të këtyre politikave dhe rregulloreve. Gjithashtu, ka një sensibilizim të ulët dhe dëshirë minimale për të vënë në veprim masat e duhura në lidhje me çështjen e përdorimit të qëndrueshëm të energjisë. 

Për këtë arësye, është i nevojshëm që të nxitet bashkëpunimi i institucioneve qendrore dhe vendore, por edhe përfshirja e biznesit, shoqërisë civile dhe çdo aktori tjetër të rëndësishëm në mënyrë që të arrihet ndërgjegjësimi i duhur mbi standartet e prodhimit dhe përdorimit të energjisë në të dyja anët e kufirit.
Në këtë mënyrë, të dyja vendet tona do të bëjnë një hap të mëtejshëm drejt Bashkimit Evropian.